Kuanjai Magazine
ຫຼັງຈາກປິດປັບປຸງຫ້ອງຂາຍ ຫຼື ສູນໂນເກຍ ມາໄດ້ເຄິ່ງປີ ມາເຖິງທ້າຍອາທີດທີ່ຜ່ານມາ LTH Store ໄດ້ເປີດໃໝ່ຢ່າງເປັນທາງການ, ພ້ອມກັບການເປີດຕົວ ຂອງການກັບມາຢ່າງເປັນທາງການ Nokia ສະມາດໂຟນລຸ້ນໃໝ່ທັງ 3 ລຸ້ນ ແລະ ມີເຄື່ອງໃຊ້ໄຟຟ້າເຖິງ 20 ຍີ້ຫໍ້ ເພື່ອໃຫ້ລູກຄ້າມີຫຼາຍທາງເລືອກ.
ພິທີເປີດຫ້ອງຂາຍໃໝ່ຈັດຂຶ້ນໃນຕອນຄໍ່າຂອງວັນເສົາວັນທີ 29 ກໍລະກົດ 2017 ທີ່ບ້ານຝາຍ (ດົງປ່າລານ) ເມືອງສີສັດຕະນາກ ນະຄອນຫຼວງວຽງຈັນ. ໂດຍໃຫ້ກຽດຕັດແຖບຜ້າຂອງທ່ານ ແຈັກ ໄຊຊະນະ ຜູ້ອຳນວຍການ ຂອງບໍລິສັດ ແອວທົງຮວດ ເທເລຄອມ ຈຳກັດ (LTH), ມີບັນດາພະນັກງານ LTH ແລະ ແຂກຖືກຮັບເຊີນເຂົ້າຮ່ວມ.
ທ່ານ ປິຍະວັດ ປຣິນສິດທິລັດ ຫົວໜ້າພະແນກເຄື່ອງໃຊ້ໄຟຟ້າ, ບໍລິສັດ ແອວທົງຮວດ ເທເລຄອມ ຈຳກັດ (LTH)ກ່າວໃນພິທີເປີດວ່າ: ຫ້ອງຂາຍ LTH Store ແມ່ນມີຈຸດມຸ່ງໝາຍ ຄືການນຳ Tecnology ທີ່ທັນສະໄໝມາຕອບສະໜອງຄວາມຕ້ອງການຂອງປະຊາຊົນລາວ ເພື່ອໃຫ້ມີຄຸນນະພາບຊີວິດທີ່ດີຍິ່ງຂຶ້ນ. ເລີ່ມຈາກ 12 ປີ ກ່ອນໜ້ານີ້ LTH ເປັນຕົວແທນຈໍາໜ່າຍສິນຄ້າ Nokia ຕໍ່ມາແມ່ນ Samsung ແລະ Apple ເຮັດໃຫ້ມາເຖິງປັດຈຸບັນ ເປັນຕົວແທນຈໍາໜ່າຍສິນຄ້າ Tecnology ລາຍໃຫຍ່ຂອງລາວ ມີເຄື່ອງໃຊ້ໄຟຟ້າອື່ນໆຫຼາຍກວ່າ 20 ຍີ່ຫໍ້ ເປັນຕົ້ນແມ່ນ: TOSHIBA, SAMSUNG, Phillips, Faber ແລະ ຍີ້ຫໍ້ອື່ນ ນັບແຕ່ໝໍ້ຫຸ້ງເຂົ້າ,ເຕົາແກ໊ສ, ໂທລະພາບ, ພັດລົມ, ຕູ້ເຢັນ, ເຄື່ອງປັບອາກາດອື່ນໆແບບຄົບວົງຈອນໃນຫ້ອງຂາຍ LTH ຫວັງເປັນອີກໜຶ່ງທາງເລືອກສ້າງຄວາມສະດວກສະບາຍໃຫ້ລູກຄ້າທີ່ມາບ່ອນດຽວຖືວ່າຄົບເລື່ອງຂອງອຸປະກອນ Tecnology ເຄື່ອງໃຊ້ໄຟຟ້າ. ນອກຈາກມີສິນຄ້າດີໆແລ້ວ LTH ຍັງມີທີມຊ່າງທີ່ມີປະສົບການ, ມີການຮັບປະກັນສິນຄ້າທີ່ມີຄຸນນະພາບບໍລິການຫຼັງການຂາຍ ພ້ອມຊ່ວຍເຫຼືອລູກຄ້າທຸກທ່ານ.
ພ້ອມດຽວກັນ, ພາຍໃນງານກໍໄດ້ນຳສະເໜີ Nokia ສະມາດໂຟນໃໝ່ທັງ 3 ລຸ້ນຄື: Nokia 3, Nokia 5 ແລະ Nokia 6 ໂດຍມາຄັ້ງນີ້ປັບໂສມເປັນຮູບຊົງສວຍງາມໂດດເດັ່ນມາກັບລະບົບແອນດຣອຍ ທີ່ມີກ້ອງໜ້າສູງເຖິງ 8 ລ້ານພິກເຊວ ແລະ ກ້ອງຫຼັງ 16 ລ້ານພິເຊວ ມີທັງສີຂາວ ແລະ ສີດຳ ໃນລາຄາ 1,950,000 ກີບ. ສ່ວນ Nokia5 ລາຄາ 1,580,000 ກີບ ແລະ Nokia3 ລາຄາ1,155,000ກີບ.
