ສາວໆທີ່ມີບັນຫາເລື່ອງສຸຂະພາບໃຫ້ອ່ານທາງນີ້ເລີຍ ເພາະທາງທີມງານ ຂັວນໃຈໄດ້ນໍາເອົາວິທີການບໍາບັດສຸຂະພາບໃຫ້ແຂງແຮງຂຶ້ນ ສໍາລັບວິວັດທະນາການທາງການແພດນັ້ນ ຖືວ່າໄດ້ພັດທະນາໄປຢ່າງບໍ່ມີມື້ສິ້ນສຸດ ເຊິ່ງປະກອບມີທັງການແພດເຂົ້າມາຊ່ວຍໃຫ້ເຮົາເລືອກຄິດ ແລະ ຕັດສິນໃຈໄດ້ງ່າຍຂຶ້ນ ເລືອກສິ່ງທີ່ດີ ແລະ ເໝາະສົມກັບຕົວເອງຫຼາຍຂຶ້ນ ໂດຍການຄັບປິ້ງ (Cupping) ຫຼື ການດູດແກ້ວ ໄດ້ຮັບມີຄວາມນິຍົມຫຼາຍໃນປັດຈຸບັນ
ຄວາມຈິງແລ້ວການດູດແກ້ວ ມີມາດົນຫຼາຍກວ່າພັນປີແລ້ວໃນປະເທດຈີນ ເຊິ່ງໃນສະໄໝກ່ອນຈະໃຊ້ບັ້ງໄມ້ໄຜ່ໃນການດູດແທນຈອກແກ້ວ ແລ້ວໃຊ້ຄວາມຮ້ອນ ຫຼືໄຟເຮັດໃຫ້ເປັນສູນຍາກາດ ແຕ່ປັດຈຸບັນເຮົາໃຊ້ຈອກແກ້ວ ເນື່ອງຈາກສາມາດລ້າງໃຫ້ສະອາດໄດ້ງ່າຍ ມີຂະໜາດຂອງຈອກທີ່ເທົ່າກັນຫຼາຍກວ່າ ທີ່ສໍາຄັນຄືຊອກຊື້ໄດ້ງ່າຍ ແລະ ຮັກສາບໍ່ຍາກ ຈຶ່ງເປັນທີ່ນິຍົມຫຼາຍ.
ຈອກແກ້ວນັ້ນມີຂະໜາດທີ່ແຕກຕ່່າງກັນ ຂຶ້ນຢູ່ກັບບໍລິເວນທີ່ຕ້ອງການດູດແກ້ວມີຕັ້ງແຕ່ຂະໜາດ 6 cm, 5.5 cm, 4.5 cm, 3.5 cm ແລະ ຂະໜາດນ້ອຍທີ່ສຸດ ໃຊ້ດູດບໍລິເວນແຜ່ນຫຼັງ, ແອວ, ກະໂພກ, ກົກຂາ, ກາງຫຼັງ, ຄໍ, ສົ້ນນ່ອງ ແລະ ໃບໜ້າ
- ການດູດແກ້ວປິ່ນປົວຫຍັງແດ່?
- ປັບສົມດຸນ ຮັກສາພູມຄຸ້ມກັນຂອງຮ່າງກາຍ ແລະ ຖ່າຍເທຂອງເສຍທີ່ເຂົ້າມາໃນຮ່າງກາຍເຊັ່ນ: ລົມ, ຄວາມເຢັນ, ຄວາມຊຸ່ມ ເມື່ອຖ່າຍເທອອກໄປແລ້ວ ຈະເຮັດໃຫ້ຮ່າງກາຍມີຄວາມສົມດຸນຫຼາຍຂຶ້ນ
- ເຮັດໃຫ້ເລືອດລົມພາຍໃນຮ່າງກາຍໄຫຼສະດວກ
- ເຮັດໃຫ້ຂໍ້ຕໍ່ຕ່າງໆເຮັດວຽກໄດ້ດີຂຶ້ນ ເພາະການດູດແກ້ວຈະຊ່ວຍຂັບລົມ, ຄວາມເຢັນ ແລະ ຄວາມຊຸ່ມທີ່ຄ້າງຢູ່ຕາມຂໍ້ຕໍ່ຕ່າງໆໄດ້
- ໃນທາງຄລີນິກຍັງອາໄສການດູດແກ້ວ ເພື່ອປິ່ນປົວພະຍາດເຈັບຫົວ, ວິນຫົວ, ເຈັບແອວ, ເຈັບແຂນຂາໂດຍບໍ່ຕ້ອງໃຊ້ຢາໃດໆ
- ສາມາດດູດພິດ ແລະ ຂັບໄລ່ໜອງໄດ້ ເພາະການດູດແກ້ວເຮັດໃຫ້ເກີດມີຄວາມດັນພາຍໃນແກ້ວຫຼາຍ ຈຶ່ງເຮັດໃຫ້ສາມາດດູດໜອງອອກມາໄດ້ ແຕ່ວິທີນີ້ມັກໃຊ້ຮ່ວມກັບການປ່ອຍເລືອດ ຈຶ່ງຈະຊ່ວຍເສີມປະສິດທິພາບໃນການປິ່ນປົວຫຼາຍຂຶ້ນ ເມື່ອດູດໜອງອອກຈະເຮັດໃຫ້ຝີ ຫຼື ຮອຍບາດດັ່ງກ່າວເຊົາໄວຂຶ້ນ
- ພະຍາດພາຍໃນເຊັ່ນ: ຫວັດ, ໄອ, ໜອງໃນ, ປອດ, ຫອບຫືດ, ໃຈສັ່ນ, ນອນບໍ່ຫຼັບ, ຝັນຫຼາຍ, ຂີ້ລືມ, ເຈັບທ້ອງ, ປວດຮາກ, ຮາກ, ສະເອິກ, ທ້ອງອືດ, ທ້ອງຂີ້ຮາກ, ກ້າມຊີ້ນອ່ອນແຮງ, ວິນຫົວ, ເຈັບຂ້າງແອວ, ພະຍາດຊຶມເສົ້າ, ບວມນໍ້າ, ຍ່ຽວຂັດ, ຍ່ຽວບໍ່ອອກ, ຍ່ຽວໃສ່ບ່ອນນອນ, ເສື່ອມສະມັດຕະພາບທາງເພດ, ພະຍາດຮ້ອນຕ່າງໆເປັນຕົ້ນ
- ພະຍາດພາຍນອກເຊັ່ນ: ໄຟລາມທົ່ງ (erysipelas), ຝີ, ໜອງເຕົ້ານົມ, ໄສ້ຕິ່ງອັກເສບ, ຕັບອ່ອນອັກເສບ, ໜິ້ວທໍ່ຍ່ຽວ ເປັນຕົ້ນ
- ສີຈາກການດູດແກ້ວບອກຫຍັງ
ຫຼັງຈາກດູດແກ້ວແລ້ວ ອາດຈະມີຮອຍມົນໆເກີດຂຶ້ນບໍລິເວນທີ່ດູດແກ້ວ ແຕ່ລະຄົນອາດຈະມີສີທີ່ແຕກຕ່າງກັນໄປ ເຊິ່ງມັນຈະສະແດງໃຫ້ເຫັນ ສະພາບພາຍໃນຮ່າງກາຍວ່າເປັນແນວໃດ ແພດສາມາດວິເຄາະ ແລະ ຕິດຕາມຜົນການປິ່ນປົວໄດ້
- ສີມ່ວງເຂັ້ມ: ມີຄວາມເຢັນຄວາມຊຸ່ມສະສົມຢູ່ພາຍໃນກ້າມຊີ້ນ ຫຼື ຂໍ້ຕໍ່ທີ່ມີບັນຫາ ເຊິ່ງຄວນຫຼີກເວັ້ນຄວາມເຢັນ ຫຼື ຢູ່ໃນຫ້ອງແອເຢັນໆຫຼາຍເກີນໄປ
- ສີແດງ: ສີແດງອ່ອນ ສະແດງໃຫ້ເຫັນເຖິງຄວາມຊຸ່ມອົມຮ້ອນພາຍໃນຮ່າງກາຍ
- ສີຂຽວ: ຈະພົບໃນກໍລະນີຕິດສານເສບຕິດຕ່າງໆເຊັ່ນ: ຢາສູບ ຫຼື ຢາເສບຕິດ
- ກ່ອນເຮັດການດູດແກ້ວ
- ກວດສອບພື້ນຖານຂອງຮ່າງກາຍ
- ຖາມປະຫວັດ
- ຟັງສຽງ ຫຼື ວິເຄາະກິ່ນສະເພາະຕົວ
- ຈັບຊີບພະຈອນ
- ເບິ່ງລີ້ນ
- ຂໍ້ຫ້າມໃນການປິ່ນປົວດ້ວຍການດູດແກ້ວ
- ຜູ້ປ່ວຍພະຍາດເລືອດ ທີ່ເຮັດໃຫ້ເລືອດຢຸດໄຫຼຍາກ
- ເປັນພະຍາດພູມແພ້ ຜິວໜັງເປື່ອຍ ອັກເສບ
- ຫ້າມໃຊ້ການດູດແກ້ວ ທີ່ໜ້າເອິກບໍລິເວນຫົວໃຈ
- ແມ່ຍິງຖືພາ ຫ້າມປິ່ນປົວດ້ວຍການດູດແກ້ວ ບໍລິເວນໜ້າທ້ອງ ແລະ ຫຼັງ
- ຂໍ້ຄວນລະວັງ
ໃນການດູດແກ້ວ ຈະດູດປະໄວ້ 10 ນາທີ ຖ້າປະໄວ້ດົນ ຫຼືໃຊ້ແຮງດູດຂອງສູນຍາກາດແຮງເກີນໄປ ອາດຈະເຮັດໃຫ້ມີຕຸ່ມນໍ້າ ໃສໆເກີດຂຶ້ນ ຫຼື ຫາກໃຊ້ສໍາລີຈຸ່ມນໍ້າເຫຼົ້າຂ້າເຊື້ອທາຫຼາຍເກີນໄປ ຈະເຮັດໃຫ້ສ່ຽງຕໍ່ການເກີດໄຟລວກໄດ້ ທັກສະນີ້ຕ້ອງອາໄສຄວາມຊ່ຽວຊານຂອງແພດສະເພາະດ້ານຢ່າງແທ້ຈິງ.