Kuanjai Magazine
ຕອນບາຍຂອງວັນທີ 13 ກັນຍາ 2017 ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ທີ່ຫ້ອງປະຊຸມຊັ້ນ 4 ( ຕຶກທ່ອງທ່ຽວ ) ໄດ້ພິທີຈັດງານຊົມເຊີຍຜົນສໍາເລັດໃນການມອບ-ຮັບລາງວັນ ວັນນະກໍາ “ ແມ່ນໍ້າຂອງ ” ຄັ້ງທີ 8 ໂດຍການເຂົ້າຮ່ວມຂອງທ່ານ ທອງໃບ ໂພທິສານ ຫົວໜ້າກົມມໍລະດົກ ທັງເປັນປະທານສະມາຄົມນັກປະພັນລາວ, ທ່ານ ນາງ ສົມພອນ ທຸມມາວົງ ຮອງຫົວໜ້າອຳນວຍການ ວາລະສານວັນນະສິນ, ຫົວໜ້າຫ້ອງ ການສະມາຄົມນັກປະພັນລາວ ທັງເປັນຜູ້ຈັດງານຊົມເຊີຍລາງວັນ ວັນນະກໍາ ແມ່ນໍ້າຂອງ ຄັ້ງທີ 8, ທ່ານ ນາງ ດາລີວັນ ສິດພະໄຊ ( ຜູ້ທີ່ໄດ້ຮັບລາງວັນທີ 1 ປະເພດບົດເລື່ອງສັ້ນ ) ແລະ ທ່ານ ແກ້ວບຸນທັນ ແກ້ວປະກາສິດ ( ຜູ້ທີ່ໄດ້ຮັບລາງວັນທີ 1 ປະເພດບົດກະວີ ) ພ້ອມດ້ວຍພະອາຈານ, ຄະນະນັກປະພັນລາວທຸກພາກສ່ວນ ແລະ ສື່ມວນຊົນກໍໃຫ້ກຽດເຂົ້າຮ່ວມ.
ທ່ານ ທອງໃບ ໂພທິສານ ຫົວໜ້າກົມມໍລະດົກ ທັງເປັນປະທານສະມາຄົມນັກປະພັນລາວ ໄດ້ກ່າວເປີດງານວ່າ: ການທີ່ເຮົາໄດ້ຈັດງານຊົມເຊີຍລາງວັນ ວັນນະກໍາ “ ແມ່ນໍ້າຂອງ ” ຄັ້ງທີ 8 ນີ້ ເຊິ່ງເປັນຜົນສໍາເລັດ ແລະ ສະແດງຄວາມຍິນດີແກ່ 2 ທ່ານ ຄື: ທ່ານ ນາງ ດາລີວັນ ສິດພະໄຊ ( ຜູ້ທີ່ໄດ້ຮັບລາງວັນທີ 1 ປະເພດບົດເລື່ອງສັ້ນ) ແລະ ທ່ານ ແກ້ວບຸນທັນ ແກ້ວປະກາສິດ ( ຜູ້ທີ່ໄດ້ຮັບລາງວັນທີ 1 ປະເພດບົດກະວີ ) ພ້ອມດ້ວຍຄະນະທັງໝົດ ທີ່ໄດ້ເດີນທາງໄປມອບ-ຮັບລາງວັນ ວັນນະກໍາ ແມ່ນໍ້າຂອງ ແລະ ສໍາມະນາວິຊາການປະຈໍາປີ 2017 ທີ່ນະຄອນຫຼວງບາງກອກ ປະເທດໄທ. ເລື່ອງທີ່ໄດ້ຮັບລາງວັນໃນຄັ້ງນີ້ແມ່ນມີຄື:
- ບົດເລື່ອງສັ້ນ: “ໄປນໍາຫາພໍ່” (ບົດທີ່ໄດ້ຮັບລາງວັນທີ 1 ປະເພດບົດເລື່ອງສັ້ນ) ປະພັນ ແລະ ສົ່ງເຂົ້າປະກວດໂດຍ ທ່ານ ນາງ ດາລີວັນ ສິດພະໄຊ ເນື້ອໃນໂດຍຫຍໍ້ແມ່ນເວົ້າເຖິງ ຊີວິດຂອງຄົນໃນສັງຄົມສະໄໝສົງຄາມ, ຜົນຮ້າຍຂອງສົງຄາມ, ຊີວິດໃນເຍົາໄວຂອງຜູ້ແຕ່ງເອງທີ່ຕ້ອງພັດພາກຈາກບ້ານເກີດເມືອງນອນ ເພື່ອໄປນໍາຫາພໍ່ທີ່ເປັນນັກປະຕິວັດ. ນີ້ເປັນຄວາມຮູ້ສຶກທີ່ອາໄລອາວອນຫາຜູ້ທີ່ລ່ວງລັບໄປໃນມື້ບຸນຫໍ່ເຂົ້າປະດັບດິນ.
- ບົດກະວີ: “ເມືອງມູນ ເມືອງແມ່” (ບົດທີ່ໄດ້ຮັບລາງວັນທີ 1 ປະເພດບົດກະວີ) ປະພັນ ແລະ ສົ່ງເຂົ້າປະກວດໂດຍ ທ່ານ ແກ້ວບຸນທັນ ແກ້ວປະກາສິດ ເນື້ອໃນໂດຍຫຍໍ້ແມ່ນເວົ້າເຖິງ ຄວາມສວຍງາມຂອງບ້ານເກີດເມືອງນອນຂອງຜູ້ແຕ່ງ, ການປ່ຽນແປງໄປຕາມຍຸກສະໄໝບໍ່ວ່າຈະເປັນດິນຟ້າອາກາດ, ສັງຄົມ, ສະພາບແວດລ້ອມ ແລະ ການດໍາລົງຊີວິດຂອງຜູ້ຄົນທີ່ອາໄສຢູ່. ນອກນັ້ນ ຍັງໄດ້ກ່າວເຖິງຄວາມອາໄລອາວອນ ຄິດຮອດບ້ານເກົ່າບ້ານຫຼັງທີ່ໄດ້ພັດພາກມາດົນນານ.
